Stjórn Samtaka atvinnulífsins kallar eftir samstarfi við verkalýðshreyfinguna og aðkomu stjórnvalda að lausn sem geti komið í veg fyrir yfirvofandi uppsögn kjarasamninga. Stjórn SA segir í ályktun að stjórnvöld verði að horfast í augu við ábyrgð sína á vaxandi verðbólgu, metviðskiptahalla, útlánaþenslu og skuldaaukningu heimilanna í landinu. Það verði að taka á því jafnvægisleysi sem einkenni íslenskan þjóðar-búskap um þessar mundir og auka aðhald opinberra fjármála. Kaupmáttur launa landsmanna sé nú hærri en nokkru sinni fyrr og við blasi að frekari hækkanir launa en þegar hefur verið samið um að taki gildi um næstu áramót myndu valda tjóni sem íslenskt efnahagslíf þurfi síst á að halda.

Mikilvægt er að íslensk fyrirtæki skipti einungis við traustar starfsmanna-leigur sem virði lög og kjarasamninga á Íslandi. Verkalýðshreyfingin verður hins vegar að gera sér grein fyrir því hver eru grunnatriði EES samnings-ins. Það er óþolandi fyrir fyrirtæki sem fara í einu og öllu að lögum og reglum að þurfa að sæta óvæginni og ósanngjarnri blaðaumfjöllunum eða jafnvel lögregluaðgerðum fyrir það eitt að þar starfi útlendingar.

Á hverju ári fá SA til umsagnar tugi lagafrumvarpa, reglugerða og tilskipana um nýjar kröfur sem atvinnulífinu ber að fara eftir. Það heyrir til algerra undantekninga ef frumvarpshöfundar, reglugerðasmiðir eða tilskipanaþýðendur reyna að meta kostnað og ávinning af hinum nýju eftirlitsreglum og kröfum sem verið er að leggja á fyrirtækin í landinu. Er það þó ótvíræð lagaskylda. Ítrekuðum athugasemdum þess efnis er yfirleitt ekkert sinnt. Metnaðarleysi stjórnvalda á þessu sviði er óviðunandi og óskandi að fyrirhuguðu átaki um „einfaldara Ísland” verði m.a. nýtt til að gera þarna nauðsynlega bragarbót.

Allstór hópur fólks er skráður atvinnulaus og þiggur atvinnuleysisbætur á sama tíma og þensla er ríkjandi á vinnumarkaði og verulegur skortur á starfsfólki á mörgum sviðum. 17% þessa fólks eru foreldrar ungra barna. Nýtt úrræði vinnumiðlunarinnar er að bjóða því fólki dagvistunarpláss á góðum kjörum samhliða atvinnutilboði. Fróðlegt verður að sjá áhrif þessa úrræðis á næstu vikum og mánuðum á atvinnleysi þessa hóps.

Miklar breytingar hafa verið gerðar á verklagi við afgreiðslu umsókna um atvinnuleyfi fyrir ríkis-borgara átta nýrra aðildarríkja EES samningsins og eru nú umsóknir afgreiddar á 2–3 vikum frá því þær berast Útlendingastofnun í stað 3–4 mánaða áður. Með þessum breytingum er brugðist við gagnrýni SA en samtökin hafa ítrekað skorað á stjórnvöld að tryggja hraða og skilvirka afgreiðslu atvinnuleyfa.

Samtök atvinnulífsins efna til fundar um áhættugreiningu og áhættumat í fyrirtækjum, þann 26. október næstkomandi. Fundurinn verður haldinn í húsakynnum SA, Borgartúni 35 - 6. hæð. Fjallað verður um auknar kröfur til fyrirtækja, framkvæmd áhættumats, og tækifæri sem geta leitt til hagkvæmari reksturs.

Aðalfundur Samtaka fiskvinnslustöðva 7. október

Menntun í ferðaþjónustu, morgunverðarfundur 11. október

Dagur samkeppnishæfni, Brussel, 20. október

Evrópsk vinnuverndarvika 24. til 28. október 

Málþing Jafnréttisráðs um launajafnrétti 27. október

Aðalfundur LÍÚ 27. og 28. október

Starfsmenntaverðlaunin - tilnefningar berist fyrir 28. október

Þegar tíu ný ríki gerðust aðilar að ESB og EES 1. maí 2004 tóku flest fyrri aðildarríki upp tímabundnar takmarkanir á frjálsri för fólks frá flestum nýju aðildarríkjanna. Hér á Íslandi hafa gilt mun strangari reglur en í Danmörku, Noregi og Svíþjóð, sem setti engar takmarkanir. Ný skýrsla norrænu ráðherranefndarinnar sýnir að nýir EES-borgarar hafa komið til allra Norður-landanna vegna atvinnu, langmest til Noregs, og alls staðar haft jákvæð áhrif á vinnumarkað og efnahagslíf. Strangar reglur hafa m.a. aukið eftirspurn eftir þjónustusamningum við fyrirtæki í nýju aðildarríkjunum.

Í samtali við Morgunblaðið segir Ari Edwald, framkvæmdastjóri SA, að hann telji rétt að afnema þegar í stað takmarkanir á frjálsri för fólks frá tíu aðildarríkjum ESB. Ríkin gerðust aðilar að ESB og EES þann 1. maí 2004 og að óbreyttu rennur út frestun á frjálsri för fólks frá þessum ríkjum þann 1. maí 2006. „Í ljósi aðstæðna sem nú blasa við, að ekkert er í spilunum um að spennuástand í samfélaginu breytist fram til 1. maí 2006 þegar frestuninni lýkur, sé ég engin efnisleg rök sem mæla með því að frestuninni sé við haldið,“ segir Ari.

Að undanförnu hafa sést fleiri auglýsingar eftir eldra starfsfólki en áður. Stjórnendur tíu stórra fyrirtækja sem SVÞ höfðu samband við sögðu það ekki vera neina nýja stefnu að leggja áherslu á ráðningu eldra starfsfólks enda hefðu menn löngu áttað sig á því að minni líkur eru til að þeir hætti eftir stuttan starfstíma heldur en þeir sem yngri eru. Þetta eru heldur engin ný sannindi fyrir SA, en fyrir rúmu ári síðan leiddi könnun samtakanna meðal aðildarfyrirtækja í ljós að 50 ára og eldri þættu mjög traustir starfskraftar.

Í ágústmánuði sl. voru skráðir 65.550 atvinnuleysisdagar á landinu öllu sem jafngilda því að 2.851 manns hafi að meðaltali verið á atvinnu-leysisskrá í mánuðinum. Þessar tölur jafngilda 1,8% atvinnuleysi. Til samanburðar mældist atvinnuleysið 2,0% í júlí sl. og 2,9% í ágúst 2004. Vinnumálastofnun gerir ráð fyrir að atvinnuleysi minnki enn í september og geti farið niður í allt að 1,6%, eða lægsta hlutfall á þessum árstíma síðan á árunum 1999 til 2001.

Það er tímabært og gríðarlega mikilvægt að endur-skoða eftirlitskerfi hins opinbera og leyfisveitingar frá grunni. Í dag er þetta kerfi allt of flókið og íþyngjandi og of dýrt í framkvæmd. Þetta sagði Ari Edwald, framkvæmdastjóri SA, í setningarávarpi ráðstefn-unnar Hreinn ávinningur, þar sem fjallað var um hvað fyrirtæki geta grætt af umhverfisstarfi. Sigríður Anna Þórðardóttir, umhverfisráðherra, sagði ráðuneytið vera markvisst að fara í gegnum eftirlitskerfi á þess vegum og að fljótlega yrðu kynntir áfangar í því starfi.

Hreinn ávinningur: Hvaða valkostir eru í boði í umhverfisvottun á Íslandi? er heitið á nýju kynningarriti þar sem er að finna yfirlit yfir þær umhverfisvottanir sem íslensk fyrirtæki hafa aðgang að og byggja á óháðri úttekt þriðja aðila. Ýmist er um að ræða vottun á vöru, þjónustu eða stjórnun, en yfirleitt eru þó ekki skörp skil þar á milli. Ritið er gefið út í tengslum við ráðstefnuna, „Hreinn ávinningur – Hvað er að græða á umhverfisstarfi fyrirtækja?” Útgefendur eru Samtök atvinnulífsins, Umhverfis-fræðsluráð, Alþýðusamband Íslands og Samtök iðnaðarins.

Seðlabankinn getur ekki brugðist við versnandi verðbólguhorfum og vaxandi verðbólguvæntingum með öðrum hætti en að hækka stýrivexti, segir Hannes G. Sigurðsson, aðstoðarframkvæmdastjóri SA, í samtali við Morgunblaðið. Hann segir ljóst að raungengi krónunnar sé í sögulegu hámarki og að stór hluti fyrirtækja hafi ekki rekstrargrundvöll við þessar aðstæður. Seðlabankinn sé afskaplega einn á báti í baráttunni gegn verðbólgu og stýrivaxtastefna bankans sé komin í öngstræti.

Samræmd vísitala neysluverðs í EES-ríkjum hækkaði um 0,3% frá júlí til ágúst sl. Á sama tíma lækkaði vísitalan fyrir Ísland um 0,2% frá fyrra mánuði. Frá ágúst 2004 til jafnlengdar árið 2005 var verðbólgan, mæld með samræmdri vísitölu neysluverðs, 2,2% að meðaltali í ríkjum EES. Lægst var hún á Íslandi, 0,4%, en 1,0% í Svíþjóð og Finnlandi. Mest mældist verðbólgan í Lettlandi, 6,3% og í Lúxemborg, 4,3%.

Samtök atvinnurekenda á Norðurlöndum hafa búið til sameiginlega uppskrift að því hvernig Norðurlöndin geti tryggt áframhaldandi velgengni sína á heimsvísu. Uppskriftin er birt í skýrslunni The Nordic recipe for global success. Skýrslan fjallar um það hvernig Norðulöndin geti brugðist við sífellt harðnandi alþjóðlegri samkeppni og í henni kemur fram að Norðurlandaþjóðirnar verði að sækja í sig veðrið, með því að bæta starfsumhverfi atvinnulífsins og efla menntun fólks enn frekar, ef takast eigi að tryggja velferð þjóðanna til framtíðar.

Á aðalfundi dönsku samtaka iðnaðarins (DI) á dögunum var fjallað um Ísland undir fyrirsögninni Meet the Winners. Að mati Dana eru Íslendingar í hópi þeirra þjóða sem hafa náð framúrskarandi árangri á sviði viðskipta og efnahagsmála. Hagstætt og samkeppnishæft skattaumhverfi, ríkur frumkvöðlakraftur og viljinn til að vinna eru Dönum efst í huga um Ísland. Á vef DI má m.a. nálgast myndband um árangur íslensks atvinnulífs.

Samtök atvinnulífsins fagna þeirri ákvörðun ríkisstjórnarinnar að ráðstafa 2,5 milljörðum króna af söluandvirði Símans til þess að efla Nýsköpunar-sjóð atvinnulífsins. SA hafa lengi lagt áherslu á mikilvægi þess að efla nýsköpunarstarf í íslensku atvinnulífi en dæmin sýna að það fé sem lagt er til rannsókna og nýsköpunar fyrirtækja skilar sér oft margfalt til baka á örfáum árum í verðmætasköpun, nýjum störfum og þar með sköttum og gjöldum til þjóðfélagsins.

Vefur Samtaka atvinnulífsins hefur tekið nokkrum breytingum. Einkum er um að ræða útlitsbreytingar þótt byggt sé á gömlum grunni. Notendur vefsins eiga því ekki að verða í vandræðum með að finna sínar síður og þá eiga allir hlekkir (linkar) af eldri vefnum að haldast. Auk útlitsbreytinga má nefna möguleikana á að stækka og minnka letur (valstika ofarlega til vinstri) og innan tíðar verður jafnframt hægt að nálgast eldri fréttir eftir málefnaflokkum.

Út er komin bókin Straumhvörf eftir Þór Sigfússon, framkvæmdastjóra Viðskiptaráðs Íslands. Í bókinni er fjallað um útrás íslensks viðskiptalífs og innrás erlendra fjárfesta til Íslands. Hvers vegna er þessi útrásarþrá í Íslendingum? Hvernig löðum við erlenda fjárfesta til Íslands? Hver verður þróunin í hnatt-væðingunni í framtíðinni? Leitað er svara við þessum spurningum og mörgum öðrum.

Fræðslumiðstöð atvinnulífsins hefur fengið styrk frá Leonardo Da Vinci starfsmenntaáætlun Evrópusambandsins að upphæð 30 milljónir í tilraunverkefni sem ber titilinn “The Value of Work.” Verkefnið miðar að því að þróa aðferðir til að meta raunverulega færni einstaklinga í atvinnulífinu. Fræðslumiðstöðin mun stýra verkefninu. Samstarfslönd eru Danmörk, England, Kýpur, Slóvenía og Svíþjóð.