Miklu máli skiptir að taka réttar ákvarðanir um skipan mála í íslensku atvinnulífi því að þær ráða hvort kreppan og erfiðleikarnir í atvinnulífinu verða tiltölulega skammvinnir eða fylgja okkur næsta áratuginn. Þetta segir Vilhjálmur Egilsson, framkvæmdastjóri SA. Hann segir raunverulega hættu á því að við eigum eftir að upplifa nýjan „áratug hinna glötuðu tækifæra" vegna rangra ákvarðana stjórnvalda. Enn bóli ekkert á vaxtalækkun þrátt fyrir að öllum ætti að vera ljóst að stýrivextir þyrftu að lækka strax í 10% og síðan hratt í framhaldinu.

Vilhjálmur segir 63 aftursætisbankastjóra vera á Alþingi sem hver hafi sinn viðskiptavinahóp. Fjölmargir slíkir bankastjórar séu einnig utan þings sem allir telji sig vita betur en bankastarfsmenn hvernig eigi að reka banka, hverjum og á hvaða kjörum eigi að veita fyrirgreiðslu.

Samtök atvinnulífsins lýsa þungum áhyggjum af stöðu atvinnu- og efnahagsmála í bréfi til formanna stjórnmálaflokkanna. Þar segir að allt of hægt hafi gengið að taka lykilákvarðanir um endurreisn atvinnulífsins og seinagangurinn valdi íslenskum fyrirtækjum enn meiri erfiðleikum en fyrirsjáanlegt var. Rúmir fimm mánuðir séu liðnir frá hruni bankanna og tímabært að ráðast í brýnar aðgerðir, t.d. lækkun stýrivaxta í a.m.k. 10%. Samtök atvinnulífsins hafa óskað eftir viðræðum við forystumenn flokkanna um þá alvarlegu stöðu sem ríkir í atvinnulífinu þegar kosningar eru framundan og stjórnmálaleg óvissa bætist við aðra erfiðleika sem við er að etja.

Mikilvægt er að Alþingi samþykki að innleiða matvælalöggjöf Evrópusambandsins áður en það lýkur störfum á næstu vikum þar sem miklir viðskiptahagsmunir þjóðarinnar eru í húfi. Matvælalöggjöfin felur í sér að sömu reglur gilda um sjávarafurðir, búfjárafurðir og önnur matvæli. Þetta tryggir jafna samkeppnisstöðu innlendrar matvælaframleiðslu gagnvart framleiðslu á EES svæðinu. Sérstaklega er þetta mikilvægt fyrir sjávarafurðir en afleiðingar þess að taka ekki upp löggjöfina geta leitt til þess að  aðgangur íslenskra sjávarafurða að mörkuðum innan ESB verði takmarkaður.

Í viðamikilli rannsókn á launum fólks sem gerð var á vegum Alþýðusambands Íslands, Samtaka atvinnulífsins og ParX, mældist enginn launamunur milli kynja meðal fólks á þrítugsaldri. Í sambærilegri könnun árið 2007 mældist munurinn 10%. Athygli vekur að launamunur kynja minnkar samkvæmt könnuninni í öllum aldurshópum. Niðurstöðurnar byggja á gögnum úr launabókhaldi fyrirtækja sem kjósa að taka þátt í árlegri greiningu á launagreiðslum.

Fyrir Alþingi liggur frumvarp til laga um breytingar á lögum um tekjuskatt og staðgreiðslu opinberra gjalda (þingmál 366). Samtök atvinnulífsins telja ýmis atriði frumvarpsins vera til bóta og geta stuðlað að bættri skattframkvæmd og betra samræmi við það sem gerist í nálægum ríkjum. Tillögurnar eru hins vegar umfangsmiklar og flóknar og geta í mörgum tilvikum haft afgerandi áhrif á samkeppnishæfni fjármálafyrirtækja og hvernig tekst til við endurreisn fjármálamarkaðarins. Á þá hlið málsins er ekki varpað ljósi í greinargerð frumvarpsins.

Aðalfundur Samtaka atvinnulífsins 2009 verður haldinn miðvikudaginn 22. apríl nk. á síðasta degi vetrar. Fundurinn fer fram á Hilton Reykjavík Nordica og hefst opin dagskrá kl. 15:00. Formaður SA, Þór Sigfússon, og Jóhanna Sigurðardóttir, forsætisráðherra, flytja erindi auk þess sem þrír stjórnendur úr atvinnulífinu munu ræða hvernig hægt sé að skapa 20.000 ný störf. Dagskrá lýkur kl. 16:30 þegar atvinnulífið kveður vetur með formlegum hætti og fagnar sumri. Yfirskrift fundarins er Atvinnulífið skapar störfin.
 

Námskeið um innleiðingu samfélagsábyrgðar - 17. mars

Aðalfundur SVÞ - Samtaka verslunar og þjónustu - 20. mars

Stefnumót atvinnulífsins í Evrópu 2009 - 26. mars

Aðalfundur SAF - 27. mars

Mikilvægasta aðgerðin í atvinnumálum um þessar mundir er lækkun vaxta. Þetta segir Vilhjálmur Egilsson, framkvæmdastjóri SA. Hann segir áform ríkisstjórnarinnar um sköpun allt að fjögur þúsund ársverka vera jákvætt skref en vaxtalækkun verði að fylgja fljótt í kjölfarið - vextirnir séu að sliga fyrirtækin.

Bankar hafi samkeppnismál til hliðsjónar við sölu fyrirtækja

Ákvörðun Seðlabankans órökstudd og skaðleg

Hvernig tölum við efnahagslífið niður?

Erlendir aðilar komi að rekstri íslenskra banka

Stóra U-beygjan

Iðnþing Samtaka iðnaðarins fór fram á Grand Hótel Reykjavík 5. mars. Í ályktun þingsins er lögð áhersla á að lækka þurfi vexti, endurreisa bankakerfið, afnema gjaldeyrishöft, semja við erlenda kröfuhafa, auka útflutningstekjur, blása lífi í fasteignamarkaðinn og sækja um aðild að ESB og taka upp evru.

Árum saman hefur verð á bæði heitu vatni og raforku farið lækkandi um land allt, að teknu tilliti til verðlagsþróunar almennt, ef frá eru skilin áhrif kerfisbreytinga sem raforkulög frá árinu 2003 höfðu í för með sér. Verð á raforku til almennra notenda er lægra hérlendis en í helstu samanburðarlöndum og hefur lengi verið. Sömu sögu má segja um verðlagningu á heitu vatni. Þetta er meðal þess sem fram kemur í ályktun aðalfundar Samorku.

Auka má fjölbreytni verulega í íslensku atvinnulífi. Þegar blæs á móti í rekstrinum líkt og nú þarf að taka til og leita nýrra leiða til aukinnar hagsældar. Það er því klókt að auka fjölbreytni í stjórnum fyrirtækja og í stjórnunarstöðum. Það getur verið ein þeirra leiða sem koma íslensku atvinnulífi fyrr af stað í sókn til bættra lífskjara.

Fræðslusjóðirnir Starfsafl og Landsmennt bjóða nú fyrirtækjum fræðslustjóra að láni án nokkurs kostnaðar í tiltekinn tíma. Mannauðsráðgjafi fer yfir fræðslu- og þjálfunarmál fyrirtækisins, dregur fram það sem vel er gert og greinir þarfir fyrirtækisins. Það er mikið til af góðum náms‐ og þjálfunarúrræðum á vinnumarkaðnum en mörg þeirra eru lítið notuð meðal smærri fyrirtækja. Mörg fyrirtæki, einkum þau stærri, eru með fjölbreyttar þjálfunaráætlanir fyrir sitt starfsfólk en skortir oft yfirsýn yfir fræðslumálin svo þau gagnist sem best bæði fyrirtækinu og starfsmönnum.

Samkomulag náðist milli SA og ASÍ um frestun fyrirhugaðra launahækkana 1. mars en ákveðið var að fresta ákvörðun um endurskoðun kjarasamninga um allt að fjóra mánuði. Samningsaðilar telja að þessi frestun sé mikilvægt framlag til stöðugleika í efnahagslífinu. Þannig geti skapast aðstæður til þess að hratt dragi úr verðbólgu og vextir geti lækkað.

Eftirspurn eftir sænskum iðnaðarvörum hefur dregist verulega saman. Til að koma í veg fyrir uppsagnir fólks hafa því samtök atvinnurekenda í Svíþjóð og verkalýðsfélög samið um allt að 20% tímabundna lækkun launa. Markmiðið er að standa vörð um störfin og gefa fyrirtækjunum sóknarfæri þegar ástandið batnar.

Mikill fjöldi stjórnarfrumvarpa sem varða atvinnulífið liggur fyrir þinginu til hraðrar afgreiðslu. Í flestum tilvikum hefur ekki verið nægilega vel vandað við undirbúning þeirra og samráð við atvinnulífið verið lítið. Þetta gengur þvert á opinbera stefnu stjórnvalda um vandaðan undirbúning og samráð við gerð stjórnarfrumvarpa. Ónóg umræða um áhrif þeirra breytinga sem í frumvörpunum felast, kosti þeirra og galla, valda hættu á því að löggjöfin verði óvönduð og hafi ýmsar ófyrirsjáanlegar afleiðingar.

Í umsögn SA um frumvarp um breytingar á Seðlabankanum sem Alþingi afgreiddi sem lög í lok febrúar lögðu samtökin til að ítarleg úttekt á stefnu og skipulagi Seðlabankans færi fram. Það væri nauðsynlegt í ljósi þess að peningamálastefna Seðlabankans hafi beðið skipbrot, bankinn væri rúinn trausti og hafi orðið gjaldþrota. Mikilvægt væri að allar breytingar á skipulagi hans stuðluðu að endurvakningu trausts á Seðlabankanum og efnahagsstefnu stjórnvalda.

Á vettvangi loftslagssamnings Sameinuðu þjóðanna er stefnt að því að ná samkomulagi um framhald svokallaðrar Kyoto-bókunar í lok þessa árs. Miðað við forsendur ESB má ætla að Ísland geti þurft að takast á hendur skuldbindingar um 15-20% samdrátt í almennri losun gróðurhúsalofttegunda fyrir árið 2020 frá árinu 2005. Útstreymi vegna stóriðju er þar ekki talið með. Þetta kom fram í erindi Péturs Reimarssonar, forstöðumanns hjá SA, á aðalfundi Samorku. Gríðarlegt átak þarf í orkumálum heimsins til að ná niður útstreymi gróðurhúsalofttegunda.

Kuðungurinn - umhverfisviðurkenning umhverfisráðuneytisins - verður afhentur á degi umhverfisins 25. apríl næstkomandi. Úthlutunarnefnd á vegum ráðuneytisins óskar nú eftir tilnefningum um fyrirtæki eða stofnanir sem hafa skarað fram úr í umhverfismálum á árinu 2008 en frestur til að skila inn tilnefningum rennur út 25. mars.